శ్రీ కృష్ణదేవరాయలు

"కళామతల్లి"

2010-06-03T01:14:00.001-05:00

"ఉత్తమ సాహితీ సుగంధాలు గుబాళించే అజరామర సినీ గీతాలను తెలుగు కళామతల్లి చరణ సుమాలుగా అర్పించి అర్చిస్తున్నసారస్వత మూర్తి నవనవోన్మేష విశిష్ట రచనా స్ఫూర్తి వేటూరి కలం నుండి పల్లవించిన ఎందఱో సినీ మహనీయుల ప్రస్తుతి వ్యాసాలే ఈ కొమ్మ కొమ్మకో సన్నాయీ." అంటూ తెలుగు వికిపీడియాలో రాసారు. అది చూశాక అప్పుడెప్పుడో ఈ 'కళామతల్లి' గురించి వేటూరి గారు వాపోయిన సంగతి గుర్తుకు వచ్చింది.

మన తెలుగు సినీ ప్రముఖులు మాట్లాడే మొదటి మూడు వాక్యాల్లో, తెలుగు 'కళామతల్లి' ముద్దుబిడ్డలం ఉండడం తప్పనిసరి, ఆఖరికి భాష మీద పట్టు ఉన్న బాలకృష్ణతో సహా! ఇక మన వార్తాపత్రికల వారూ, ఘనత వహించిన తెలుగు ఛానెల్సూ, వాటి" లంగర్లూ" విరివిగా వాడే మాట ఈ 'కళామతల్లి'. వీరి అన్వయం అంతా 'తల్లి' మీదనే. ఆఖరికి ఇది సినీ కళామతల్లి, రాజకీయ కళామతల్లి, తెలంగాణా కళామతల్లి అంటూ కళామతల్లి విగ్రహాలు కూడా తయారు చేస్తున్నారు. ఇక్కడ ఓ సారి నొక్కండి.

అసలు 'కళామతల్లి' అంటే ఏమిటి? మతల్లి అంటే శ్రేష్ఠమైన లేద గొప్ప అని అర్థం. కళామతల్లి, అంటే అన్ని కళల్లో శ్రేష్ఠమైనదని అర్థం, అంతే కాని ఆమె ఓ 'తల్లి' కాదు నాయనలారా... అని వేటూరిగారే స్వయంగా అరచి గీపెట్టినా, వినే నాథుడు లేకుండాపోయాడు. అందుకే మనం తెలుగు పాఠాలపై కాస్త శ్రద్ధ వహించాలని మనవి. ఇంతకూ ఆ వేటూరి గారి వ్యాసం దొరకలేదు కానీ, ఈ 'మతల్లి' గురించి నాకు ప్రాణప్రదమైన ఆముక్తమాల్యదలోని ఈ పద్యంలో ఉంది. చూ. వీచిమతల్లి = గొప్ప అల.

అంత కంటే గొప్పగా ఆ పద్యాన్ని, పనసతొనలు ఒలిచి నోటికిచ్చిన చందంగా విడమరచి చెప్పిన భైరవభట్ల వారి అద్భుతమైన వ్యాఖ్యానం చదివితే ఇంకా బాగా అర్థమవుతుంది. చూ."కలశపాథోరాశిగర్భ వీచిమతల్లి కడుపార నెవ్వాని కన్నతల్లి" - స్థూలంగా చూస్తే, "పాలసముద్రమునుంచి పుట్టినవాడు ఎవడో అతడు" అని అర్థం, అంతే! ఇందులో కవిత్వమేముంది? అని పెదవి విరిచేస్తే ఏమీ లేదు! ... సీస పద్యం ఒకో పాదంలోనూ చంద్రుని ఒకో గొప్పతనాన్ని వర్ణించాడు. చంద్రుని వంశోన్నతిని చాటుతున్నది మొదటిపాదం. అయితే ఇందులో మంచి చమత్కారాన్ని చేశాడు పెద్దన. చంద్రుడు ఫలానా పాలసముద్రపు కొడుకు అని అన్నాడా? లేదు! కలశపాథోరాశి అంటే పాలసముద్రం. ఆ పాలసముద్రం మధ్యలోనున్న, "వీచి మతల్లి". మతల్లి అంటే శ్రేష్ఠమైన లేద గొప్ప అని అర్థం. వీచి అంటే అల. వీచిమతల్లి అంటే ఒక గొప్ప/పెద్ద అల..." కాబట్టి ఇకనైనా 'తల్లి' అనే అర్థంలో కాకుండా నిజమైన అర్థం తెలుసుకొని మాట్లాడితే, ఆ పాటల మాంత్రికుని మాటలకు అర్థం చేకూర్చినవారవుతాం.

అది అలా ఉంచితే ఈ 'తెలుగు పద్యాల'ను, 'తెలుగు పాఠాల'ను మరచిపోకుండా చదివితే, అదే మన తెలుగు కళామ'తల్లి'కి మనం చేసే నిజమైన సేవ! :-*

"భట్టు మూర్తి"

2010-06-02T01:41:00.001-05:00

"జీవిత సత్యం"

2010-05-31T23:05:00.003-05:00

:-)

"గత స్మృతులు"

2010-05-31T22:57:00.001-05:00

-తిరుమల రామచంద్ర గారి "హంపీ నుంచి హరప్పా దాకా" నుంచీ

ట్వీటుతున్న తెలుగు తారలు!

2010-04-27T09:34:00.002-05:00

మన భారతీయులకు క్రికెట్, సినిమా అంటే పంచప్రాణాలు. ఇప్పుడు అంతర్జాల మహిమ వల్ల ఆ రెండూ ప్రపంచంలో ఎక్కడున్నా అందరికీ అందుబాటులో ఉన్నాయి. మొన్న ఐ.పి.ఎల్. 'ఆఖరి పోరాటం' యూట్యూబ్ లో చాన్నాళ్ల తర్వాత చూసాను. ఇక వారం వారం సితారలు, సూపర్ హిట్లు చదివే అవకాశం లేనివారికి 'ఐడిల్ బ్రైన్లు' అవసరం లేకుండా మీ వెండి తెరవేల్పులు సరాసరి మీ అంకోపరిలపై, మీ హస్తభూషణాలపై వాలుతున్నారు తమ జీవితాల్ని, ఆశల్ని, ఆశయాల్ని మీతో పంచుకుంటూ...కొండొకచో మీతో నేరుగా సంభాషిస్తూ...ఒక్కసారిగా మీకు, మీ అభిమాన తారలకు ఉన్న అడ్డుగోడలన్నీ ఒక్క ట్వీట్ తో పటాపంచలయిపోతాయి. మహేష్ బాబు దగ్గరి నుంచి అక్కినేని నాగార్జున దాకా...ప్రియా ఆనంద్ నుంచి త్రిష కృష్ణన్ దాకా... అల్లు శిరీష్ నుంచి రాం గోపాల్ వర్మ దాకా...తారాలోకం మీ చెంత- ట్వీటండి ...మనసారా!

రోహిత్ & సుహాస్

తారలు దిగివచ్చిన వేళ

మహేష్ బాబు
అక్కినేని నాగార్జున
ప్రియా ఆనంద్
త్రిష
అల్లు శిరీష్
రాం గోపాల్ వర్మ
రిచా
స్వాతి
సిధ్ధార్థ
సుమంత్
రాణా
జెనీలియా డిసౌజా
అసిన్

ఉత్తర దిక్కుగా ...

హృతిక్
షారూఖ్
దీపికా
ప్రియాంక
శ్రేయ ఘోషల్
షమ్మీ కపూర్
ఎ.ఆర్. రెహమాన్

ఇట్లు

మీ భవదీయుడు :-)

గత చరిత్ర ఆనవాళ్లు

2010-04-19T02:43:00.002-05:00

పెనుకొండ కోట

అఫ్సర్, కల్పన, రానారెలతో ఓ సాయంత్రం!

2010-04-01T05:59:00.002-05:00

'దొంగలు పడిన ఆర్నెల్లకు కుక్కలు మొరిగినట్లు'...ఇదిగో ఇప్పుడు కుదిరింది. ఆ మధ్యన (అనగా దాదాపు ఓ నెల క్రిందట) మా బామ్మర్ది డెట్రాయిటు నుండి రావడం, వాడు హ్యూస్టను నగర విహారం చేయాలని సరదాపడడం, సతీ-పుత్ర-పుత్రికా సమేతంగా మేము బయలుదేరడం వరకూ అంతా సవ్యంగానే జరిగింది. కానీ పోయిన మొదటిరోజే మా ఘనత వహించిన 'డాడ్జ్-గ్రాండ్-కారవాను' మమ్మల్ని నడిరోడ్డులో నిలువునా ముంచడం, మా వాడి 'నాసా' ఆశల మీద నీళ్లు చల్లడం అన్నీ ఓ పద్ధతి ప్రకారం పై వాడు జరిపించాడు.

సరే ఇక చేసేదేముంది అని కారవానుని పెప్-బాయ్స్ కు అప్పజెప్పి, మారువేషంలో కాకున్నా రాత్రి పూట నగరవిహారం అయ్యిందనిపించాం. ఇక మరునాడు ఓ అద్దెకారులో చచ్చీచెడీ మా ఊరు వచ్చి పడ్డాం. కాకపోతే మరుసటి రోజే కారవాను ఇక ఆగకుండా దౌడు తీయగలదు అని పె.బా. వాళ్లు భరోసా ఇచ్చాక మళ్లీ మరోసారి హ్యూస్టను దారిపట్టాను. వాడికి ఓ వెయ్యి వరహాలు సమర్పించుకొని, ఇక ఓ హోండా 'పైలటు'ను అవ్వొచ్చన్న నా ఆశలు అడియాసలు కాగా ఊసూరుమంటూ మళ్లీ మా ఇంటి దారి పట్టాను.

ఈ వ్యవహారమంతా ఓ వైపు జరుగుతూండగా ఆస్టిన్ నుంచీ 'అఫ్సర్-కల్పన' ద్వయం, అఫ్సర్ గారి చిరకాలమిత్ర దర్శనం కోసం హ్యూస్టను వేంచేస్తున్నారని వేగు అందింది. మొదటిసారి వెళ్లినప్పుడు యథాప్రకారం రామనాథుడికి 'కాల్చేయడం'(చూ.కొత్తపాళీ), వారితో పాటు 'లీడర్' చిత్రరాజాన్ని చూసి, ఆ ఇద్దరు ముద్దుగుమ్మల అందాన్ని ఆస్వాదించడం అయ్యింది.

ఇక మళ్లీ మొదటికొస్తే..మా అమ్మ ఊరికి బయలుదేరింది. హ్యూస్టనులో విమానం, కాబట్టి మళ్లీ ప్రయాణం! అలా ముచ్చటగా మూడోసారి ఓ వారం రోజుల వ్యవధిలోనే 'విశ్వనగరాన్ని' సందర్శించే అవకాశం, సరిగ్గా అదే సమయంలో అఫ్సర్ గారి కుటుంబం అక్కడే ఉండడం తటస్థించింది. సరే అమ్మను విమానమెక్కించాక భారమైన హృదయంతో 'రానారె' ఇంటి వైపు పయనమయ్యాను. ఆ సమయానికి అయ్యవారు ఓ సంగీత సభలో తన గానంతో శ్రోతలను రంజింపచేయవలసి ఉంది. కానీ ఈ సారి పైవాడు కరుణించి ఆయన దారికి అడ్డంకులు సృష్టించి నా కోసం తన సమయాన్ని కేటాయించాడు.అఫ్సర్ గారికి ఈ విషయం తెలియజేసి, ఒంటరి పక్షి అయిన రానారె ఇంటనే మా 'ముషాయిరా'కు ముహూర్తం పెట్టాం. అలా ఈ సాయంత్రం మొదలయ్యింది. ( అమ్మయ్య! ఉపోద్ఘాతం ముగిసింది.)

మొదట ముఖపరిచయాలు అయ్యాక, తీరిగ్గా కబుర్లలో పడ్డాం. అఫ్సర్ గారు మా అనంతపురంలో 'ఆంధ్రభూమి'లో పనిచేసారని తెలిసింది. మా అనంతపురం బాషనీ, పల్లెప్రజల ఆప్యాయతల్ని పొగుడుతూ ఉంటే ఎక్కడో కాస్త గర్వంగా అనిపించింది. ఇక రెంటాల కల్పన గారినీ ఇదే మొదటిసారి చూడడం. ఆమె గురించి ఎన్నో యేళ్ల క్రితమే చదివాను, అలాగే అఫ్సర్ గారి సాహిత్య పేజీల్నీ మరమరాల్లాగ నమిలేసిన గుర్తులు ఉన్నాయి. అలాంటి వారిని కళ్లెదుట చూడడం నిజంగా అబ్బురమే!

ఇది నా వైపైతే, అటు అఫ్సర్ గారు, కల్పన గారు 'రానారె' అంటే ఎవరో తల నెఱిసిపోయిన పెద్దాయన అనుకొని, ఎదుట నిలుచున్న నవయవ్వన యువకుణ్ని చూసి నోరెళ్లబెట్టారు. కడప మాండలికానికి మరో 'నామినీ' అని కితాబులిచ్చారు. అలా మొదలయ్యిన మాటలు ఇక కోటలు దాటాయి. తెలుగు కవిత్వంలో పోకడలు, మతం-కులం, స్థానిక చరిత్ర, తెలుగు కవయిత్రులు, రాష్ట్ర రాజకీయాల నుంచీ ప్రపంచ రాజకీయాల దాకా...అబ్బో చాలా, చాలా మాట్లాడేసుకొన్నాం. అఫ్సర్ గారు 'గూగూడు కుళ్లాయప్ప' గురించి చేస్తూన్న పరిశోధన నాకు చాలా ఆసక్తి కలిగించింది. ఎందుకంటే మతసామరస్యానికి పేరెన్నికగన్న అనంతపురంలోని 'గూగూడు' గ్రామంతో మా కుటుంబానికి ఉన్న అనుబంధం, అంతే కాక మా అమ్మమ్మ పేరు 'కుళ్లాయమ్మ' కావడం, మా జేజినాయన పేరు 'కుళ్లాయప్ప' కావడం ఈ పరిశోధనపై అనురక్తిని కలిగించింది.

ఇక్కడ ఓ విచిత్రం జరిగింది. అఫ్సర్ గారేమో తెలంగాణా 'ధూం-ధాం!" అంటున్నారు, రానారె 'విశాలాంధ్ర' నినాదమిచ్చాడు, నేనేమో 'రాయలతెలంగాణా' మంచి ఆలోచన అంటూ...మధ్యలో కల్పన గారే ఏమీ మాట్లాడలేదు. అఫ్సర్ గారిది నల్లొండ అయితే, కల్పన గారిది బెజవాడ. అలాగే మా ఇంట్లోనూ సీమ-కోస్తానే! రానారెనే సీమ కట్టుబాటు దాటకుండా చిత్తూరు అమ్మాయిని కట్టుకోవాలనుకొంటున్నాడు. పెద్దలు కుదిర్చిన వివాహం కాస్తా ఎడబాటు వల్ల ప్రేమ వివాహం అయ్యి కూర్చొంది. అయ్యవారేమో విరహగీతాలు పాడేసుకొంటున్నాడు. అందుకే తన బ్లాగులో విరివిగా టపాలు రావడం లేదని అప్పుడు అర్థమయ్యింది.

సరే, అతిథులకు 'రానారె' సంగీతాభిరుచిని పరిచయం చేద్దామని, చెప్పడమే తడవు, మన వీరబల్లె వీరుడు గొంతెత్తి "సిరిమల్లె పువ్వా..." అంటూ పాట ప్రారంభించడంతో అందరూ ఒళ్లంతా చెవులు చేసుకొని మరీ విన్నాం. ఓ పాట తర్వాత మరో పాట అలా ఆ సాయంత్రం పాటలా సాగిపోయింది. పూటకూళ్ల వారింటి నుంచీ తెచ్చిన భక్ష్యాలతో భోజనం కావించి కవి-జంట ఇంటికి బయలుదేరారు. ఆ రాత్రికి ఉండిపోండి అంటే పిల్లవాణ్ని మితృని ఇంటిలో వదిలి వచ్చినందున పోకతప్పలేదు. పోతూ పోతూ మా ఇద్దరికి ఆఫ్సర్ గారి "ఊరి చివర", కల్పన రెంటాల గారి "నేను కనిపించే పదం" కవితా సంకలనాల్ని ఈ కలయికకు తీపిగుర్తుగా బహూకరించారు. వాటి గురించి నా సమీక్ష త్వరలో...

నాకు "స్మైల్"దేవరాయల వారికి కాస్త ప్రాంతీయాభిమానంతో అని అఫ్సర్ గారు, "రాయల"ఇస్మాయిల్ కు సాహిత్యాభినందనలతో అని కల్పన గారు పుస్తకంపై వారి స్వదస్తూరీతో రాసి, సంతకం చేసి మరీ ఇచ్చారు. అదో తబ్బిబ్బు! ఇవన్నీ రానారెకు రాసిన మూడే మూడు మాటల ముందు తేలిపోయాయి..."సీమ మాట పొగరు" రానారెకు అని రాసుందందులో. నీకు మున్ముందు ఎన్ని బిరుదులొచ్చినా ఈ ఒక్క మాట చాలు ,కోహినూరు వజ్రంలా చిరస్థాయిగా నిలిచిపోతుంది అని రానారెతో అన్నాను. ఎంత చక్కటి మాట, ఎంత రోషమున్న మాట, ఎంత సరైన మాట...రానారెకు ఇది అతికినట్టు సరిపోతుంది. అలా కవిత్రయంతో ఆ సాయంత్రం అలా ముగిసింది.

కొసమెఱుపు: అలా వారు వెళ్లిపోయాక, ఒంటరి గాళ్లయిన మేమిద్దరం ఈ సారి మార్గరీటాతో కాకుండా, ఓ మధువనితో సర్దుకొందాం అనుకొన్నాం. కానీ పెళ్లి కాకుండానే 'పెళ్లాం-మెగుడ'యిన రానారె తనకు ఆ అనుమతి లేదని మనవి చేసుకొంటే నేనొక్కడినే ఓ అరపాత్ర ఎఱ్ఱటి మధువుని గ్రోలుతూ, రానారె విరహగీతాల్ని ఆస్వాదిస్తూంటే మా 'న్యామద్దల' గ్రామం నుంచీ కాలొచ్చింది. అది ఎవరో కాదు సకలకళావల్లభుడయిన మా బావ 'ఖలీల్' నుంచి. ఆయన పాటల్లో 'రానారె' కంటే రెండాకులు ఎక్కవే నమిలాడు. ఇక దూరవాణిలో ఇద్దరి జుగల్-బందీ మొదలయ్యింది.
ఒకరికి మించి ఒకరు మధురాతిమధురంగా పాటలు పాడుతూంటే నా మనస్సు ఎక్కడికో తేలిపోయింది. చివరికి 'రానారె' కూడా మా బావ పాటలకు తాదాత్మ్యం చెంది సంగీతసాగరంలో మునిగి తేలాడు. కానీ ఖలీల్ పాడిన చివరి పాట నా గుండెను చెఱువు చేసింది, అప్పటికే ఉన్న కాస్త నిషా కాస్తా ఆ పాటతో తలకెక్కేసింది. ఆ కొన్ని క్షణాలు నేనెంత ఆనందం అనుభవించానో చెప్పనలవి కాదు. ఆ పాట మీరూ నినండి...

My Name is 'ఇస్మాయిల్'!

2010-02-15T15:17:00.001-06:00

గత కొన్నాళ్లుగా తీరిక లేక బ్లాగ్లోకం వైపు రావడం తగ్గించాను. కొత్తగా ఫేస్బుక్కు , ట్విట్టరూ తగులుకున్నాయి మఱి. కానీ 'కొత్తపాళీ' గారి ఆజ్ఞాపన చూశాక రాయక తప్పడం లేదు. అమెరికా జీవితం, ప్రజలు,వారి జీవన వైవిధ్యం, ఇంకా కష్టనష్టాలూ, ఈతిబాధలూ బాగా దగ్గరగా చూసే అవకాశం, వారి నాడి పట్టి చూసే డాక్టరుకే తెలుస్తుంది . అలా రాయడానికి బోలెడంత సరుకుండగా మరి ఈ కొత్త టైటిలేంటీ? అనుకొంటున్నారా!

అమెరికా వరకే కాకుండా నేటి ప్రపంచంలొ జరుగుతున్న చాలా సంఘటనలకు సంబంధం ఉన్న విషయంతో మొదలుపెడదామనుకొన్నాను. మై నేమ్ ఈజ్ 'ఖాన్' సృష్టించిన వివాదం అందరికీ తెలిసిందే. సినిమాలో చెప్తున్న విషయమేంటీ? అన్నది లేశమాత్రం పట్టించుకోకుండానే, ఏదో ఇతర సందర్భంలో ఓ వ్యాఖ్య చేశాడని ఓ మంచి చిత్రాన్ని అడ్డుకునే దురుద్దేశపూర్వక చర్య 'శివసేన' అధినేత 'టైగర్' థాకరే గారిది. చివరికేం జరిగింది? ప్రజాభిమానం ముందు 'పులి' తోక ముడిచింది.

ముందు నుంచీ నేను చెబుతున్న 'common sense' పాయింటు ఒక్కటే. తీవ్రవాది మగవాడని, మగవాళ్లంతా తీవ్రవాదులు ఎలా కారో- కొందరు తీవ్రవాదులు ముస్లింలైనంత మాత్రాన, అందరు ముస్లింలు తీవ్రవాదాలు కారు. ఇది తెలివి, జ్ఞానం, వివేచన ఉన్న పెద్దలకే అర్థం కానప్పుడు, థాకరేల వెంట పరుగులెత్తే సామాన్య జనానికి ఏం అర్థమవుతుంది?

ఎవరు దేశభక్తులో నిర్ణయించేది ఓ 'రా.నా.' కాదు, ప్రజలు. మన ప్రజాస్వామ్యంలో మరోసారి ఇది నిరూపితమైంది. బాలీవుడ్ బాద్షాలకే ఇలాంటి నింద తప్పనప్పుడు, కూరలమ్ముకునే ఏ 'మస్తాన్' కైనా ఎలా తప్పుతుంది. ఈ దేశం మాది కూడా! తరతరాలుగా, కొన్ని వేల సంవత్సరాలుగా ఈ నేలతో ఉన్న అనుబంధం, కేవలం కొన్ని వందల సంవత్సరాల క్రితం స్వీకరించిన మతం కారణంగా పరాయిదయిపోదు.

ఈనాడు దేవదేవుడిగా కొలువబడుతున్న 'షిర్డీ సాయునాథు'ని నోటి వెంట నిరంతరం స్మరించబడిన నామం 'అల్లా మాలిక్!'. ఆయనే ఇప్పుడు బ్రతికుంటే, ఏ పాకిస్థాన్ ఏజెంటో, ఫకీరు వేషంలో తిరుగుతూ ఉన్నాడని చెప్పి మహారాష్ట్ర బహిష్కరణ విధించి ఉండే వారు ఈ మూర్ఖులూ, ముష్కరులూ. (పాపం శమించు గాక!)

షారూఖ్ చేసిన పాపమేంటీ? పాకిస్థాన్ వాళ్లను మన దేశవాళీ జట్టులో ఆడించుకొంటే తప్పేమిటీ? అనడమే! అందులో తప్పేమైనా ఉంటే పాకిస్థానుతో క్రికెట్ఠాట ఆడడమే మానేస్తే పోలా? ఇండియా-పాకిస్థాన్ మ్యాచుల ముందు ఏ సూపర్ బౌల్లూ దిగదుడుపే! దాయాదుల పోరు జరిగినప్పుడు దేశం యావత్తూ టి.వి.లకే అంకితం అయిపోవడం చిన్నప్పటి నుంచీ కద్దు. 'రామాయణ్', 'మహా భారత్' సీరియల్లంతగా టి.వి.లకు అతుక్కుపోయే వారు. నేటికీ ఆ ఉత్సాహం తగ్గింది లేదు.

షారూఖ్ వంశంలో తండ్రి, తాతలు ఈ దేశంతో మమకారం పెంచుకొన్న వారే, సేవ చేసిన వారే. 'ఆజాద్ హింద్ ఫౌజ్' లో పనిచేయడం దేశభక్తి కాకపోతే, ఇక దేన్ని దేశభక్తి అంటారో? నాకైతే అర్థం కావడం లేదు. థాకరే గారి ఆరాధ్యనీయుడు, దేశభక్తుడూ, ధీరోధాత్తుడూ అయిన 'వీర శివాజి' తండ్రి పేరు 'షాహాజీ', పినతండ్రి పేరు 'షరీఫ్ జీ'. శివాజీ తాత మాలోజీ ఒక ముస్లిం సూఫీ ఫకీరు అయిన 'షాహా షరీఫ్' ఆశీర్వచనాలతో పుట్టినందు వల్ల తన కుమారులిద్దరికీ ఆయన మీద భక్తిభావంతో పెట్టుకొన్న పేర్లివి. అనుమానం ఉన్న ఎవరైనా చరిత్ర పుటల్ని తిరగేయవచ్చు. ఇప్పుడు బ్రతికుంటే షాహాజీ, షరీఫ్ జీలు కూడా తమ పేర్ల కారణంగా వివక్షను ఎదుర్కొని ఉండేవారే. మేము శివాజీ తండ్రి, బాబాయిలమయ్యా అని మొత్తుకున్నా మన 'శివ సైనికులు' వారిని వదిలి ఉండే వారు కారేమో?

ఇక మన షారూఖ్ 'గౌరి'ని పెళ్లి చేసుకొని, ఇద్దరు పిల్లలతో అన్యోన్యంగా కాపురం చేసుకొంటున్నా, తన నటన ద్వారా, చిత్రాల ద్వారా ఈ దేశప్రజల వినోదానికి, ఉల్లాసానికీ తోడ్పడుతూ, తద్వారా వారి మానసిక సంతోషానికి, శారీరక ఆరోగ్యానికీ పరోక్షంగా, ఇతోధికంగా సాయపడుతూ ఉన్నా ఆయన దేశద్రోహి అయ్యాడు. ఏం చేద్దాం ఒక మనిషి వ్యక్తిత్వాన్ని ఈ దేశంలో పేర్లతో, మతంతో, ప్రాంతంతో కొలుస్తారని అందరికీ తెలియదు కదా! అందుకే అన్నాడు మహాకవి "కొంతమంది యువకులు పుట్టుకతో వృద్ధులు... పేర్లకీ, ఫకీర్లకీ, పుకార్లకీ నిబద్ధులు." Bravo! Sharukh.

షారూఖ్ బాలీవుడ్ లో అడుగుపెట్టిన మొదటి చిత్రం 'దీవానా' నుంచి... తన సినిమా జీవితంలోని మొదటి 'షాట్' ఇదే!

పట్టాభిషేకం!

2010-02-15T00:59:00.001-06:00

కృష్ణ దేవరాయలు గుర్తున్నాడా? అతడేనండీ... ‘దేశ భాషలందు తెలుగు లెస్స’ అని తెగమొత్తుకున్నవాడు! అతగాడు గద్దెనెక్కి 500 ఏళ్లు అయిందట. అదేదో పేద్ధ విశేషమైనట్టు కర్ణాటకలో బిజెపి గవర్నమెంటు మహార్భాటం చేసేస్తోంది. ఇప్పటి మారాజుల లీలలకు పరవశించటానికే ఎక్కడి సమయం చాలని మనకు ఎప్పుడో ఐదొందల ఏళ్లకింద కత్తితిప్పిన ఒకానొక మధ్యయుగపు రాజు గురించి ఆలోచించటానికి బొత్తిగా టైముండదు. రాయలు ‘కన్నడరాజ్య రమారమణు’డు కాబట్టి ‘కన్నడరాయ’డి వేడుకల గోలేదో కన్నడ ప్రభుత్వం చూసుకోవడమే సబబు. అంతేనా? కృష్ణరాయలిని ఆత్మీయంగా తలచుకోదగ్గ అనుబంధం తెలుగువాళ్లకు కూడా ఏమైనా ఉందా?

* * *

కృష్ణదేవరాయలు తెలుగుగడ్డన పుట్టలేదు. అతడి తల్లిభాష తుళు. రాజ్యమేలింది ప్రధానంగా కన్నడ సీమను. అయినా మాస్టర్‌పీస్ అనదగ్గ ఏకైక కావ్యం ‘ఆముక్తమాల్యద’ను అతడు రాసింది తుళులో కాదు; కన్నడంలోనూ కాదు; కష్టపడి నేర్చుకున్న తేటతెనుగులో! తెలుగునాట తెలుగింటపుట్టి కూడా ఇంగ్లిషులో ఆలోచించి సంకర తెలుగులో రాసే... సందుదొరికినప్పుడల్లా తెలుగుభాషను కించపరిచే ఈ కాలపు తెలుగుశాల్తీలు రాయల కాలిగోటికి సరిపోరు.

రాయల రాజధాని ఉన్నది కన్నడ దేశంలో. దాని చుట్టూ ఉన్నవి కన్నడ ప్రాంతాలు. ‘రాయల’సీమను మినహాయిస్తే ఆంధ్రదేశం రాయలవారి ప్రత్యక్ష పరిపాలన కింద ఉన్నది చాలా తక్కువ. ఇప్పటి ఆంధ్ర, తెలంగాణల్లో అత్యధిక భాగం కళింగ గజపతుల, గోలకొండ కుతుబ్‌షాహీల ఏలుబడిలో ఉండేవి. యుద్ధాల్లో జయించినా, రాజ్యాలను గుంజుకోకుండా ఎవరి ప్రాంతాలను వారికి తిరిగి ఇచ్చేసిన ఉదారుడు శ్రీకృష్ణదేవరాయలు. తెలుగుదేశంలో అధికభాగం వేరే రాజుల పాలన కింద ఉన్నప్పుడు తన రాజ్యంలో తెలుగుభాషకు పెద్దపీట వెయ్యాల్సిన అవసరం రాయలకు లేదు. అయినా విజయనగర రాజ్యంలో కన్నడంతోబాటు తెలుగుకూ అధికార భాష హోదా ఉండేది. విశాల ‘ఆంధ్రప్రదేశ్’ ఏర్పడ్డ అర్ధశతాబ్దం తరవాత కూడా అధికారభాషగా తెలుగుకు దిక్కులేని సిగ్గుచేటు దుర్గతికి కారకులైన తెలుగు మారాజులకు కృష్ణరాయల గొప్పతనం నూరుజన్మలకైనా బుర్రకెక్కుతుందా?

* * *

ఇంతాచేసి కృష్ణదేవరాయలు రాజ్యమేలింది కేవలం ఇరవై ఏళ్లు. వాటిలో చాలా ఎక్కువభాగం యుద్ధాలకే చెల్లిపోయింది. ఒకవైపు బహమనీ సుల్తాన్లు, ఇంకో దిక్కున గజపతులు, మరోవంక ఆదిల్‌షా, కుతుబుషాహీలు కత్తిగట్టి, కాలరాచేందుకు సర్వసంసిద్ధంగా ఉండగా... ఒక యుద్ధం గెలిచిన ఆనందం ఆట్టేకాలం నిలవకుండా ఇంకో ముట్టడి తరుముకువస్తూ... అష్టకష్టాలూపడి దాన్నీ తట్టుకునేసరికి వేరొకచోట తిరుగుబాటు లేచే కల్లోల పరిస్థితుల్లో ఎంత గొప్ప కవిరాజుకైనా పెల్లుబికేది భావుకత కాదు... వ్యాకులత. సామ్రాజ్యం ఎల్లెడలా బుసలుకొట్టే విషనాగులను తప్పించుకుంటూ, నిరంతర యుద్ధ సన్నాహాల్లో తలమునకలై కూడా కవి పండితులతో సాహిత్య గోష్ఠులు జరిపి, ‘అష్టదిగ్గజాలను’ పోషించి, ఆ తెలుగువల్లభుడు రెండే రెండు దశాబ్దాల్లో లోకానికి చేసిన సాహిత్యసేవతో పోల్చితే మన ప్రజాయుగంలో ప్రజల సొమ్మును తెగమేసే అకాడమీలు, యూనివర్సిటీలు... పబ్లిక్, ప్రైవేటు సాహిత్య సంస్థలు తరతరాల్లో ఊడబొడిచిన నిర్వాకం ఏపాటి?

* * *

శ్రీకృష్ణదేవరాయలు పేరు చెబితే ఈ కాలం కుర్రాళ్లకు ‘ఆదిత్య 365’ సినిమాలో బాలకృష్ణ గుర్తొస్తాడు. వయసుమళ్లిన వాళ్లకేమో ‘తెనాలి రామకృష్ణ’, ‘మల్లీశ్వరి’, ‘మహామంత్రి తిమ్మరుసు’ల్లో ఎన్.టి.రామారావు జ్ఞాపకం వస్తాడు. ఏ తరం సినిమాల్లోనైనా చూపించేది- కవులతో కబుర్లాడుతూ... సానివాళ్ల మోజులో పడి రాజ్య బాధ్యతలు వదిలేస్తూ... ప్రేమికులను వేరు చేస్తూ... మేలు చేసిన వాడి కళ్లు పీకించే ఓవరాక్షనే్ల కాబట్టి అసలైన రాయలు కూడా ఆ బాపతేనని జనం మనసులో ముద్రపడటం సహజమే. కృష్ణరాయలను కళ్లతో చూసి, నేరుగా మాట్లాడి, దీర్ఘకాలం అతడిని దగ్గరగా గమనించి, యుద్ధానికి అతడి వెంట వెళ్లి అతడి మహోన్నత వ్యక్తిత్వాన్ని అద్భుత శౌర్యప్రతాపాలను, అతడిలోని మానవతామూర్తిని చూసింది చూసినట్టు కళ్లకు కట్టించిన పోర్చుగిసు జాతీయుల కథనాలతో Robert Sewell నూరేళ్ల కింద సంకలించిన A Forgotten Empireను ఇంటర్నెట్‌లో ఎవరైనా ఉఛితంగా చదువుకోవచ్చు. దేశంపైకి దండెత్తివచ్చిన ప్రతి విదేశీయుడి చేతిలోనూ దేశీయ ప్రభువులు దారుణంగా ఓడిపోయారని, ముఖ్యంగా మహమ్మదీయ మహాయుగంలో ముస్లిం ప్రాబల్యాన్ని నిలువరించిన మొనగాడే లేడని చిత్రించే అబద్ధాల చరిత్ర గ్రంథాల్లో సైతం ఏకైక మినహాయింపుగా కానవచ్చే వీరాధివీరుడు కృష్ణదేవరాయలు. ఇరవై ఏళ్ల హయాంలో చేసిన ప్రతి యుద్ధాన్నీ ఆయన గెలిచాడు. బహమనీ సుల్తాన్ల వంటివారు ఎందరు ఏకమైనా, ఎన్ని వైపుల నుంచి కమ్ముకువచ్చినా బెదరక, లక్షల సైన్యంతో బాహాబాహీ ఢీకొని, సేనలను తానే ముందుండి నడిపించి, ఎప్పటికప్పుడు వ్యూహాలు మార్చుతూ, అపజయాలను సైతం దిగ్విజయాలుగా మార్చుకొనగలిగిన ప్రపంచస్థాయి ‘జనరల్’ మధ్యయుగ భారత చరిత్ర మొత్తంలో ఒకే ఒక్కడు: కృష్ణ దేవరాయలు! చుట్టూతా మోహరించిన శత్రువులతో వీరోచితంగా పోరాడుతూనే... ఇరుగు పొరుగు రాజ్యాలన్నిటితో తెలివిగా దౌత్యాన్నీ నెరపి, శాంతి, సామరస్యాలను ఒడుపుగా సాధించగలిగిన రాయలిని చూసి... పొరుగువారిలో నిష్కారణంగా అపోహలను రేకెత్తించటంలో ఘనులైన ఆధునిక భారత ప్రభుత్వాలు నేర్చుకోవలసింది చాలా ఉంది. మిగతా దేశమంతా నీరాజనమెత్తే మాట ఎలా ఉన్నా కనీసం జన్మభూమి కంటే మిన్నగా రాయలు అభిమానించిన తెలుగుగడ్డ అయినా ఆయనతో అనుబంధానికి ఇవ్వవలసిన విలువ ఇస్తుందా? ఆంధ్రావాలా కాదు; తెలంగాణ వాడూ కాదు కనుక ఆ కన్నడం వాడితో మనకేమి పని అని దులపరిస్తుందా? ‘తెలుగదేలయన్న దేశంబు తెలుగు’ అన్న ప్రమాదకరమైన వ్యక్తిని గుర్తుచేసుకుంటే ‘సమైక్యవాది’ అన్న చెడ్డ పేరు ఎక్కడ వస్తుందోనని సంశయిస్తుందా? ఊరూరా శిలావిగ్రహాలు వేయించకపోతే మానె... కనీసం ప్రభుత్వపరంగా, తెలుగు సమాజపరంగా ‘పట్టాభిషేకానికి 500 ఏళ్ల’ సందర్భాన్ని తగిన విధంగా గుర్తుచేసుకోవటానికైనా కృష్ణరాయలు నోచుకోడా?

-సాక్షి , ఆంధ్రభూమి.

2010 : నూతన సంవత్సర శుభాకాంక్షలు!

2009-12-31T13:08:00.002-06:00

కొత్త సంవత్సరానికి, అలాగే మరో కొత్త దశాబ్దానికి స్వాగతం పలుకుతూ ... I wish "All is Well" in 2010:-) చిత్రం: సుహాస్

నా 'అవతారం'

2009-12-20T14:20:00.000-06:00

అమ్మయ్య! ఓ పరీక్ష ముగిసింది, ఒకటి కాదు రెండు రోజులు- రోజుకి ఎనిమిది గంటల పాటు జరిగే ఈ బృహత్కార్యానికి మంగళం పాడేశాను. ఇది దాటందే పట్టా చేతికి రాదు. మొత్తానికి సంతృప్తికరంగా పూర్తి చేశాను. పరీక్ష పూర్తయిన మరుక్షణం చేసిన మొదటి పని 'అవతార్' టిక్కెట్లు జాలంలో పట్టడం.

మొత్తానికి ఐమాక్స్ కుదరకపోయినా '3డి' లోనే చూడడం జరిగింది. సినిమా పై భారీ అంచనాలతో వెళితే ఒక్కోసారి నిరాశే ఎదురవుతుంది. కానీ నిజంగా ఈ సినిమా ఓ అద్భుతసృష్టి. అన్నిటికన్నా ఈ చిత్రంలో నాకు నచ్చింది ఆ చెట్లూ , పుట్టలూ! మరీ ముఖ్యంగా నావీ వారి నివాసమైన 'కెలూట్రాల్'.

సినిమా కథ అందరికీ ఈ పాటికి తెలిసే ఉంటుంది. నవతరంగంలో బోల్డన్ని రివ్యూలు. కానీ మానవ జన్యువుని, నావీ ట్రాన్స్'క్రిప్టేస్ తో సృష్టించిన 'అవతార్', నిజజీవితపు నాడీవ్యవస్థతో అనుసంధానించబడి, మన మెదడు నియంత్రణలో పని చేయడమనే భావన ఈ చిత్రానికి ఆయువుపట్టు.

చందమామ కథలు నచ్చే ప్రతి ఒక్కరికీ ఈ సినిమా నచ్చుతుందనే భావిస్తాను. అసలు మన భారతీయ ఇతిహాసాల్లో నుంచి స్ఫూర్తి పొందిన విశేషాలు ఎన్నో- సినిమా పేరు దగ్గర నుంచీ, ఆ నీలి రంగు మన నీలిమేఘశ్యాముడిదేగా. ఇక నావీలూ, వారి తోకలూ, ఆ అరణ్యమూ చూస్తూంటే మన వానర సైన్యం, దండకారణ్యం గుర్తుకు రావూ. ఏది ఏమైనా సృష్టికి ప్రతిసృష్టి చేసిన ఆ సాంకేతికతకు నా జోహార్లు.

ఇక అమెరికా పరంగా ఈ చిత్రంలో లెక్కలేనన్ని 'connotations'. ఆరోగ్యభీమా, ఆక్రమణ యుద్ధాలు, సామ్రాజ్యవాదం, ఇంధన సంక్షోభం, జీవవైవిధ్యం, పర్యావరణ పరిరక్షణ...ఇలా చెప్పుకుంటూ పోతే ఎన్నో. ఒక్కోచోట సంభాషణలు చురుక్కుమంటాయి. అయినా జేమ్స్ కెమరూన్ ఇవన్నీ తన ధృక్పథంలో ఉన్నవేననీ ఘంటాపథంగా చెప్తున్నాడు.

వయస్సొచ్చాక నేను చూసిన మొదటి హాలీవుడ్ సినిమా 'ది ఆబిస్'. సినిమా చూశాక ఆ విభ్రాంతి నుంచి తేరుకోవడానికి చాలా రోజులు పట్టింది. ఆలాంటి అనుభవాన్నే మిగిల్చింది ఈ చిత్రం. కానీ ఆ విభ్రాంతికీ ఈ విభ్రాంతికీ పొంతన లేదనుకోండి. తెలిసీ తెలియనప్పుడు కలిగే అబ్బురం కన్నా, కాస్త జ్ఞానం వచ్చాక పొందే అనుభవం తప్పకుండా తక్కువే అవుతుంది. చివరికి చెప్పొచ్చేదేమంటే ఈ సినిమా తప్పకుండా చూడండి అని.

కడుపు మండమంటే మండదా?

2009-12-18T18:44:00.000-06:00

'తెలంగాణా' ప్రత్యేక రాష్ట్రంగా చేయడానికి మేమంటే మేమని సంతకాలతో సహా ముందుకొచ్చారే? ఇప్పుడేమో ద్వంద్వ వైఖరి ప్రదర్శిస్తూ తమ తమ రాజకీయ ప్రయోజనాల దృష్ట్యా 'సమైక్యాంధ్ర' జపం చేస్తున్న ఈ రాజకీయులను చూసి ఏ తెలంగాణా వాడి కడుపు మండదు.

ఒక 'లగడపాటి', ఒక 'కె.సి.ఆర్.' - వీరికి ఉన్న నిబద్ధత ముందు మిగతా రాజకీయులంతా బలాదూర్.గోడ మీద పిల్లి వాటం వలె 'బాబు',తెలంగాణా కు ఓకె అంటూ ఓట్లడుక్కొని ఇప్పుడు ఇలా చేయడం అన్యాయం అని ఒక్కరికీ అనిపించలేదా. తెరాసకు ఓట్లు రాలేదు సరే కానీ 'సమైక్యాంధ్ర' అని ఓట్లు అడుక్కొన్న ధీరుడొక్కడైనా ఉన్నాడా ఈ శిఖండుల్లో...చివరికి మా చిరంజీవి కూడా...ఎంత దుర్మార్గం.

అవన్నీ సరే కానీ మన తెలుగు బ్లాగు 'సమైక్యవాదుల'కు ఓ సూటి ప్రశ్న సంధించారు ఆనందిని'సంతోష్ కుమార్' గారు...
"ఇదేమిటి?...ఇగ్నోర్‌ చేయవద్దు.. జవాబు ఇవ్వండి"
http://kovela.blogspot.com/2009/12/blog-post_19.html
చదువరి గారిని, శరత్ గారిని, తాలబాసు గారిని, అబ్రకదబ్ర గారిని, వంశీ గారిని,సుజాత గారిని దీనికి సమాధానం ఇవ్వాలని నేను వినమ్రంగా అడుగుతున్నాను.

'తెలంగాణ'- చరిత్ర చెప్తున్న నగ్న సత్యాలు!

2009-12-13T15:35:00.018-06:00

సీమ బిడ్డగా ' తెలంగాణ' పట్ల నా సంఘీభావాన్ని ప్రకటిస్తూ...

1
200

500

1030

1200

1540

1700

1860

1956

స్నేహితుని విజయాన్ని ఆస్వాదిస్తూ...మళ్ళీ మీ ముందుకు!

2009-06-15T22:08:00.016-05:00

{ నేటి 'సాక్షి'లో }

{డి.ఎస్.పి."సుబ్బరాయుడు", నేటి గ్రూప్ 1 విజేత "సోమశేఖరరెడ్డి"లతో, అనంతపురం 2005}

మీకు గుర్తుండే ఉంటుంది 2006లో ఒకసారి ఇలాగే బ్లాగు ముఖంగా గ్రూప్-1లో డి.ఎస్.పి. పోస్టు దక్కించుకొన్న మిత్రున్ని అభినందిస్తూ రాసిన టపా! అదే ఫోటోలో ఉన్న మరో ప్రాణమిత్రుడే ఈ రోజు గ్రూప్-1లో మరో విజయపతాకాన్ని ఎగురవేసాడు. ఈ విజయం వెనకాల ఏడేళ్ల శ్రమ, పట్టుదల ఉన్నాయి. నిన్ననే "The Pursuit of Happyness" సినిమా చూశాను. ఆ సినిమాను సమీక్షిస్తూ ఓ విమర్శకుడు ఇలా అంటాడు ". . . The beauty of the film is its honesty. In its outlines, it's nothing like the usual success story depicted onscreen, in which, after a reasonable interval of disappointment, success arrives wrapped in a ribbon and a bow. Instead, this success story follows the pattern most common in life - it chronicles a series of soul-sickening failures and defeats, missed opportunities, sure things that didn't quite happen, all of which are accompanied by a concomitant accretion of barely perceptible victories that gradually amount to something. In other words, it all feels real." చివరి సీన్లో తన విజయాన్ని ఆస్వాదిస్తూ 'విల్ స్మిత్' చేసిన నటన అద్భుతం. ఆ భావోద్వేగమే ఒక సంవత్సరం క్రితం నేను అనుభవించాను, ఇప్పుడు నా మిత్రుని విజయంలో ఆస్వాదిస్తున్నాను. 'జయహో' సోమశేఖరా!

{సోము, నేను - 2008}

'అన్న'గారి స్మృత్యర్థం!

2009-01-18T20:47:00.004-06:00

తెలుగు వారి గుండెల్లో ఎప్పటికీ నిలిచిపోయే విశ్వవిఖ్యాత నటసార్వభౌమ మన అన్న 'ఎన్టీయార్' వర్థంతి సందర్భంగా ఆయనకు నివాళులు అర్పిస్తూ... కొన్ని జ్ఞాపకాల మాలలు!

'సాక్షి'లో జ్యోతక్క వ్యాసం!

2009-01-18T20:42:00.000-06:00

'హ్యూస్టన్' నుంచి నూతన సంవత్సర శుభాకాంక్షలు!

2009-01-03T14:04:00.009-06:00

జనవరి 1, 2009. కొత్త సంవత్సరపు తొలి క్షణాలు... తేట తెలుగు పాటలను, అదీ మన 'రానారె' నోట వింటూ మొదలెట్టాను. ఎన్నాళ్లగానో అనుకొన్న ప్రయాణం 2008, డిసెంబరు 31న కుదిరింది. 31 రాత్రి 'కింగ్' సినిమా థియేటర్లో కలవాలనుకొన్నప్పటికీ, మన 'కాదరయ్య' మిత్రబృందంతో కలసి వనవిహారం చేస్తూండడం వల్ల, సినిమా అయ్యాక కలిసాం. ఇక 'కింగ్' బాగానే వినోదపరచింది, బోలెడు నవ్వుల్ని పంచింది.

ఆ తరువాత మావాళ్లని ఓ హోటల్లో దించేసి, పన్నెండింటికి అందరూ ఒకరికొకరం శుభాకాంక్షలు చెప్పుకొని, అటుపై మేమిద్దరం రానారె ఇంటికి బయలుదేరాం. అలా కొత్త సంవత్సరపు తొలి క్షణాలు హ్యూస్టన్ నగర వీధుల్లో, రంగు రంగుల టపాసుల పేలుళ్ల మధ్య, రానారె 'రథ'సారథ్యంలో నడిచాయి. ఇక ఇంటికెళ్లాక, న్యూఇయర్ రోజు 'మార్గరీటా'ను పలకరించకపోతే బావోదని అడ్రసు తెలుసుకొని మరీ వెళ్లి ఓసారి(ఒక్కసారే) పలకరించి వచ్చాం.

అప్పటికే అలసిపోయిన కథానాయకునికి 'రీటా' పరిచయం తరువాత కొంచెం హుషారొచ్చింది. సన్నగా కూనిరాగాలు మొదలయ్యాయి, ఆ రాగాలాపన కోసమే ఇంత దూరం వచ్చిన నేను మహా సంతోషపడి దరువెయ్యడం మొదలుపెట్టాను. 'కాదరయ్య పాట'ను కాదరయ్య నోటనే వినడం నేను చేసుకొన్న అదృష్టం కాదా? అటుపై నాకత్యంత ప్రియమైన పాట 'ఏ దివిలో విరిసిన పారిజాతమో' ఆ గొంతులో అలా జాలువారుతూంటే మైమరచిపోయి విన్నాను. ఇంకా ఎన్నో మధురమైన పాటలతో, అలా ఆ రాత్రిని ఏకవీరలో ఎన్టీయారు, కాంతారావుల 'వసంత రాత్రి'లా మార్చేశాం:-)

మళ్లీ ఉదయం తిరిగి హోటలుకు బయలుదేరిన మాకు ఈ కింది దృశ్యం కనిపించి అబ్బురపరచింది. దూరంగా ఆ వెండి మబ్బులు, సునామీ కెరటం నగరం మీద పడబోతోందా అనే భ్రాంతిని కలిగించాయి. అలాగే తన కారులో బాలసుబ్రహ్మణ్యం పాతపాటలు వింటూ, 'కడప కేంద్రం' నుంచి చిత్రసీమ ఫిలిం గీతాలు విన్నంత అనుభూతిని పొందాం.

'కొత్త సంవత్సరపు స్వాగత కిరణాలు'

కారులోనూ కొన్ని పాటలకు గొంతు కలిపి ఆనందించాం. ఆ ఆనందాన్ని మీతో పంచుకోవాలని నా ఐఫోనులో ఆ క్షణాలను బంధించినా, నేనూ కాస్త గొంతు కలపడం వల్ల, కొత్త సంవత్సరం మీకు తలనొప్పి తెప్పించే ప్రమాదం ఉందని ఇక్కడ పెట్టడం లేదు. 'సిరిమల్లె నీవె...విరిజల్లు కావె" అంటూ ఇద్దరూ గొంతు కలిపి పట్టపగలే 'వెన్నెల'ను తాగినంత పని చేశాం. ఆ తరువాత నన్ను హోటల్ దగ్గర దించేసి, తన మిత్రులతో కలవాలని మా అందరికి వీడ్కోలు చెప్పి వెళ్లిపోయాడు.

ఇంకో విశేషం అప్పుడెప్పుడో 'రానారె పెళ్లి' అని మిమ్మల్ని మభ్యపెట్టడానికి ప్రయత్నించాను, ఇప్పుడు ఇనుకోండి రానారె పప్పన్నం పెట్టే రోజు నిజంగానే వచ్చేసింది, పెళ్లీడు కొచ్చిన అమ్మాయిలూ...మీ ఛాన్స్ మిస్సయ్యింది. అప్పుడప్పుడూ దూరవాణిలో కాబోయే శ్రీమతితో ముచ్చట్లలో మునిగాడు కూడా, అయినా పెద్దలు నుడివినట్లు 'భద్రం బి కేర్ ఫుల్ బ్రదరూ!' అంటూ నేనూ ఓ పాట పాడి కాస్త భయపెట్టాను. ఏమాటకామాటే చెప్పుకోవాలి కుర్రాడు చాలా బుద్ధిమంతుడు అని మా శ్రీమతి దగ్గర మాంఛి సర్టిఫికెటొకటి కొట్టేసాడు:-)

ఆ తరువాత మేము హ్యూస్టన్లోని 'మీనాక్షి' ఆలయానికి వెళ్లాం. అక్కడ ఎంతో మనోహరంగా అలంకరించిన దృశ్యాలను చూసి తరించి, ఆరుబయలు గుడారాల్లో పెట్టిన పూటకూళ్ల వారి దగ్గర ఇడ్లీ-వడ, పూరీ, దోశె వగైరాలని కడుపారా ఆరగించాం. పక్కనే ఉన్న గ్రంథాలయంలో వెల్చేరు గారి 'క్లాసికల్ తెలుగు పొయెట్రీ' ఆంగ్ల పుస్తకాన్ని, తెలుగు పాటల విజ్ఞానఖని 'వి.ఎ.కె. రంగారావు'గారి 'ఆలాపన'ని కొని సంబరపడ్డాను. అలాగే కొన్ని మంచి శాస్త్రీయ సంగీతం సిడిలు కూడా.

రెండో ప్రపంచ యుద్ధనౌక పై 'డాడీ'

ఆ తరువాత ఎన్నాళ్లగానో చూడాలనుకొంటున్న 'నాసా' కేంద్రాన్ని దర్శించాము. అంతరిక్ష శాస్త్రమెప్పుడూ నన్ను అబ్బురపరస్తూ ఉంటుంది. అక్కడ చూసిన చిత్రాలు, విశేషాలు సంభ్రమాశ్చర్యాలను కలిగించాయి. చంద్రుని పై మనిషి అడుగులను, అందుకు ఆలంబనగా నిలిచిన 'మిషన్ కంట్రోల్' గదిని చూసి అచ్చెరవొందాను. మానవుడు సాధించిన ప్రగతికి, శాస్త్రవిజ్ఞానానికి సాక్ష్యంగా నిలిచింది 'మూన్ ల్యాండింగ్'.

చందమామ నుంచి తెచ్చిన 'చంద్రశిల'ను తాకగానే ఏదో తెలియని అనుభూతి . మనమూ ఆ చంద్రునిపై నిలబడినట్లు ఒక్కసారి ఊహించుకొంటే, ఈ సృష్టిలో మన స్థానమేమిటో ఎరికలో వచ్చి మన మధ్య జరిగే యుద్ధాలు, కక్షలూ, కార్పణ్యాలు అన్నీ మటుమాయమవుతాయి. ఒకప్పుడు పైలట్ కావాలని కలలు కన్న నేను, మా 'సుహాస్'ని అంతరిక్ష యాత్రికుణ్ణి చేయాలని మనస్సులో అనుకొన్నాను (వాడికిష్టం ఉంటేనే లెండి!).

చంద'మామ' వాళ్లింటి కెళ్లడానికి సిద్ధమవుతున్న 'అల్లుడు':-)

ఇక రాత్రికి 'మొఘల్' రెస్టారెంటులో విందారగించి తిరుగు ప్రయాణం మొదలుపెట్టాం. అలా కొత్త సంవత్సరపు తొలి రోజు స్నేహ-సాహిత్య-సాంస్కృతిక-శాస్త్ర విజ్ఞానాల వేదికగా నిలిచింది. అయితే గడచిన సంవత్సరం నాకు వ్యక్తిగతంగా ఎన్నో శుభాలను చేకూర్చింది. అలాగే ఈ కొత్త సంవత్సరం భూమిపై నివసించే అందరికీ మంచి జరగాలని ఆశిస్తూ మీకందరికీ "నూతన సంవత్సర శుభాకాంక్షలు". సెలవా మఱి!

' రానారె 'తో 'రాయలు'

"లోకా సమస్తా సుఖినోభవంతు! సర్వేజనా సుఖినో భవంతు !!

'నేడే చదవండి' మీ అభిమాన సినీ'జాల'పత్రికలో...

2008-12-28T23:35:00.003-06:00

సినిమాలు చూడ్డమే గానీ వాటిని సమగ్రంగా సమీక్షించింది ఎప్పుడూ లేదు. ఇప్పుడైనా ఓ సమీక్షలా కాకున్నా సినిమా చూసిన తరువాత నా అనుభూతుల్ని మీతో పంచుకుందామని, దానికి సమీక్ష అనే లేబిల్ ఒకటి వేసి మహాజనం పై విసిరాను. మన 'నవతరంగం'లో నేడే చూసి, చదివి తరించండి:-)

Disclaimer: నా వృత్తి పరంగా 90శాతం సమయం తొంభై ఏళ్లకు దగ్గర పడిన అవ్వలూ, తాతలకు సేవలందించాల్సి వస్తోంది. వారి జబ్బులను నయం చేయడం కన్నా, వారితో ప్రేమగా ఓ రెండు మాటలు మాట్లాడితే చాలు- వారి ముఖం వెయ్యి వొల్టుల బల్బులా వెలిగిపోతుంది. అలా కాసేపట్లోనే దగ్గరైన వారు, ఒక్కోసారి నా కళ్ల ముందే అందని తీరాలకు సాగిపోతూంటారు.

ఒక్కోసారి అప్పుడే పుట్టిన పాపాయిని పరీక్షిస్తూ నోట్లో వేలు పెట్టి (gloved finger though, for assessing their sucking reflex) వారి ఆత్రాన్ని చూసి నవ్వుకొని కొన్ని క్షణాలైనా కాకమునుపే, ఓ అవ్వ మరణధృవీకరణ చేయాల్సి రావడం, అదే వేళ్లతో లేని నాడి కోసం ప్రయత్నించడం, ఒక్కసారిగా నన్ను ఆనందం లోనుంచి విషాదంలోకి తోసేస్తూంటుంది. చనిపోయిన నా స్నేహితుల నుదురు ముద్దాడి ఇక వెనక్కు తిరక్కుండా వచ్చేస్తాను.

"జాతస్య హి ధ్రువో మృత్యుర్ధ్రువం జన్మ మృతస్య చ

తస్మాదపరిహార్యేऽర్థే న త్వం శోచితుమర్హసి 2-27 " - భగవద్గీత.

'పుట్టిన వాడికి మరణం తప్పదు, అందుకు శోకించుట తగదు' అని గీతాకారుడు అన్నా ఒక్కోసారి కన్నీళ్లు ఆగవు. 'గుండె మంటలనార్పే చన్నీళ్లు కన్నీళ్లు' అన్న ఆత్రేయ గీతం ఇందుకు సాక్ష్యం. అలా నా అనుభవాల నేపథ్యంలో చూసాను కాబట్టి సమీక్ష కాస్త గాఢంగా ఉండొచ్చు. కానీ మొత్తానికి సినిమా బావుంది. అక్కడ చెప్పలేదు కానీ యువకుడిగా మారిన బ్రాడ్ పిట్`ను పరిచయం చేస్తూ చూపిన దృశ్యంలో ఓ మోటారుసైకిలులో స్టైలుగా అలా దిలాసాగా రోడ్డుపై వెళుతూంటే నా నోట్లోంచి అనుకోకుండా 'ఈల' వచ్చింది. (మామూలుగా ఆ ఈల 'అన్న'గారికి, మా 'మెగాస్టార్'కి పరిమితం:-)

(చిత్ర సౌజన్యం: క్రియేటివ్ కామన్స్. కుమార్ గారూ: ఆ చిక్కుముడికి సమాధానం- మన భారతం:-)

'హోమియో' పని చేస్తుందా? మనం ఏం చేద్దాం?

2008-12-28T22:07:00.006-06:00

'రావు గారి' టపాకు స్పందన ఈ టపా: 'హోమియో' పనిచేస్తుందా? అంటే చేస్తుంది, కొంతవరకు. అదీ దీర్ఘకాలిక రోగాలకు- immunological disorders from simple 'allergic rhinitis' and to more complex 'connective tissue disorders'. కానీ ఏ వైద్య విభాగమయినా చికిత్సలను కొన్ని శాస్త్రీయ పరిశోధనల ద్వారా బుజువు చేయాల్సి ఉంటుంది. అది చేయడానికి డబ్బు, అవసరం అది ఎవరిస్తారు? ప్రభుత్వమే అలాంటి ప్రయత్నాలకు చేయూతనిచ్చి హోమియో, ఆయుర్వేద వైద్య విధానాలను శాస్త్రీయ పరీక్షకు నిలబెట్టాలి. ఫలితం సకారాత్మకంగా ఉంటే ఎంతో మందికి స్వాంతన కలిగించిన వారవుతాం. ఏమో? మన ఆయుర్వేదంలోని మందుల్లో ఎయిడ్స్ కారక హెచ్.ఐ.వి. వైరసును నిరోధించే శక్తి ఉన్న పసరు ఉందేమో? పరీక్షిస్తే కదా తెలిసేది.

అయితే Small Pox, Polio, Measles ఇలా చెప్పుకొంటూ పోతే ఎన్నో అంటువ్యాధి మహమ్మారులను దాదాపు నిర్మూలించే విధానం కనిపెట్టింది అల్లోపతి విధానంలోనే. ఒక్క పెన్సిలిన్ వలనే చావు నుంచి బయటపడ్డ ప్రాణాలు ఎన్నో కోట్లు ఉంటాయి ఈ వందేళ్లలోపు. అలాగే గుండెపోటు, హృద్రోగ సంబంధ వ్యాధులకు, కాన్సర్, ఆస్థ్మా లాంటి ఊపిరితిత్తుల వ్యాధుల చికిత్సలో అల్లోపతి చికిత్సకు సాటి అయిన వైద్యవిధానం మరోటి లేదు. Think : Aspirin, Statins, Beta blockers, Anti hypertensives, Streptomycin, Antiretrovirals, Antibiotics, Albuterol, Corticosteroids, Insulin, ICDs, Pacemakers...the list goes on and on.అయితే దాని పరిమితులు దానికీ ఉన్నాయి. 24 ఏళ్ల యువకుడిని 'Scleroderma & CTD' కు కోల్పోయాం, అన్ని ప్రయత్నాలు చేసినా కాపాడలేకపోయం. అలాగే ఇంకో పార్శ్వంలో నుంచీ చూస్తే ఓ 60 ఏళ్ల వృద్ధుడు, ఇప్పుడు 72 ఏళ్ల యువకుడు.

ఆ కథానాయకుడు, నిన్న నేను మాట్లాడిన నా పేషంట్ భర్త 'మిస్టర్ X'. ఆయన గుండె పనిచేయని (terminal cardiac failure) కారణంగా 8 నెలలు ఐ.సి.యులో చావుకు అతి దగ్గరగా గడిపాడు. ఒక కుటుంబం దురదృష్టవశాత్తూ(ఆయన అదృష్టవశాత్తూ???), 16 ఏళ్ల కుర్రాడు మొదటిసారి కారు నడుపుతూ ప్రమాదానికి గురయి మెడ దగ్గర వెన్నుపాముకి బలమైన దెబ్బ తగిలి కోమాలోకి వెళ్లిపోయాడు (vegetative state) అంటే brain dead అన్నమాట. కేవలం తన driving license మీద తన అవయవాలను దానం చేయడానికి అంగీకరించినందు వల్ల, వారి కుటుంబం ఒప్పుకోలుతో ఆ అబ్బాయి గుండెను మన X గారికి అమర్చారు. ఇప్పుడు ఆ 16 ఏళ్ల గుండె వయస్సు 28 ఏళ్లు. X గారు సంపూర్ణ ఆరోగ్యంతో ఎంతో చలాకీగా వ్యవసాయం చేస్తూ, తను పండించిన పంటలనే తింటూ ఆ అబ్బాయిని తన గుండెల్లో నిలుపుకుంటూ జీవిస్తున్నాడు గత పన్నెండేళ్లుగా!

ఇందులో మనకు ఆదర్శం: చావులో కూడా అమరుడయిన ఆ అబ్బాయి 'simple'' decent act. Organ donationకు అంగీకరిస్తూ మన డ్రైవింగ్ లైసెన్స్ మీదో, లేదా వీలునామా లోనో రాసుకుంటే ఎవరో ఒకరి కళ్లలోనో, గుండెలోనో మనం తిరిగి జీవిస్తాం. ఒకరి కాలేయంగానో, కిడ్నీగానో వారి శరీరంలోని విషపదార్థాల నుండి కాపాడే 'గరళకంఠుడు' అవుతాం. ఇంకో వ్యక్తి ఊపిరిత్తిత్తుల్లో ఊపిరులూదే 'దేవుడు' అవుతాం. ఇలా అధమపక్షం ఓ ఏడు మంది జీవితాలకు అమృతం పోసిన వారవుతాం. ఏడు జన్మలున్నాయో లేవో కానీ, మనల్ని పోలిన ఏడగురు వ్యక్తులు ఉన్నారో లేరో కానీ, మనం ఈ పృథ్విపై లేకపోయినా ఏడు జీవితాలతో మన జీవితాన్ని పెనవేసుకొని ఇంకో రకంగా బ్రతుకుతాం. నేనెప్పుడో ఈ పని చేసేశాను. ఇంకెందుకాలస్యం మీరూ ఇప్పుడే ఆ పనిలో ఉండండి. ఇది ఖచ్చితంగా 'పని' చేస్తుంది."ఆలస్యం అమృతం విషం"!

(చిత్ర సౌజన్యం: క్రియేటివ్ కామన్స్. వ్యాఖ్య టపా చేసినందుకు ధన్యవాదాలు 'రావు' గారూ!)

రెండు మంచి వార్తలు!

2008-12-15T19:47:00.007-06:00

ఈ మధ్య వార్తలు చదివితే అంతా చెడే జరుగుతోంది అనే భావన కలుగుతోంది. అలాగే ఓ మంచి విషయం విని సంతోషించి చాలా కాలమయినట్లు అనిపిస్తోంది. కానీ ఈ రోజు ఓ రెండు వార్తలు చదివి మండుటెండలో పన్నీటి జల్లు కురిసినంత సంతోషం వేసింది. కుల-మత- వర్గ భేదం లేకుండా పేద కుటుంబాల వారికి, వారి శక్తి మేర చదువుకున్నంత వరకూ ప్రభుత్వం అండగా నిలబడడం బహుధా ప్రశంసనీయం. పేద వర్గాల వారిని ఆదుకునే ఒకే ఒక్క ఆయుధం 'చదువు' అని నా ప్రగాఢ నమ్మకం. నాకు తెలిసి తెలివి ఉన్నా, స్థోమత లేక ఆగిపోయిన చదువులెన్నో, అలాంటి వారికి ఈ నిర్ణయం నిజంగా ఓ వరం. ఈ నిర్ణయం తీసుకొన్నందుకు ప్రభుత్వాన్ని అభినందించాలి. ఇంతలా కాకున్నా కొంత వరకు 'ఆరోగ్య శ్రీ' పథకం కూడా ప్రజలకు ఉపయోగపడుతోందనే అనుకొంటున్నాను. (Disclaimer: నేను అధికార పార్టీకి, వారి పార్టీ పత్రికకు గుడ్డి అభిమానిని కానని సవినయంగా తెలియజేసుకొంటున్నాను. ఇంకా విశదీకరించాలంటే 'సూర్య'బావుటా నిగనిగలు, 'ప్రజారాజ్యపు' ధగధగల కోసం వేచి ఉన్న ఓ సగటు అభిమానిని:-) అలాగే మా అనంతపురంలో జరిగిన ఈ సుహృద్భావ సంఘటన కూడా ఆహ్వానించదగ్గది. I am celebrating this incident with a spiritual fervor! And this is the ground reality in small towns and villages all across the country, which is in stark contrast to the views espoused by many in the Telugu Blog world, who are spewing hatred towards Indian muslims in all possible ways. They are integrated into the national fabric, they are not a stain, they are one among the threads of the tunic, which is INDIA. "ఏకం సత్ విప్రా బహుధా వదంతి."

{ చిత్రాలు: 'సాక్షి' సౌజన్యం}

'వాహ్'టె టీమ్!!!

2008-12-03T08:13:00.006-06:00

వాహ్! ఇక హిల్లరీ క్లింటన్ 'మేడమ్ సెక్రటరీ' మన పరిభాషలో అమెరికాకు కాబోతున్న కొత్త విదేశాంగ మంత్రి. బరాక్ అధ్యక్షుడు, హిల్లరీ సెక్రటరీ ఆఫ్ స్టేట్! ఇదే విషయాన్ని కొన్ని నెలల క్రిందట చెబితే ఎవరైనా "పోబ్బా! భలే చెప్పొచ్చావు కానీ" అని ఎగతాళి చేసేవారు. ఎవరో అన్నట్టు "స్కిజోఫ్రినియా" అని అనుమానపడినా ఆశ్చర్యం లేదు. ఏదేమైనా కొత్త అధ్యక్షుడి ఒక్కో నిర్ణయం ఎంతో విజ్ఞతతో, సమయస్ఫూర్తితో తీసుకొంటున్నట్లు ఋజువవుతోంది. I strongly applaud him for his non-partisanship and to move forward with a team of rivals.

ఇక ఒబామా మీద చాలా విమర్శలే వచ్చాయి మన బ్లాగుల్లో. అక్కడ వ్యాఖ్యానిస్తే మళ్లీ ఓ 'రచ్చ' కు తెరతీసినట్లవుతుందని ఏదో నాకు తోచింది నా బ్లాగులో రాసుకొంటున్నాను. (బ్లాగుబద్ధమైన హెచ్చరిక: ఇది ఎవరినీ వ్యక్తిగతంగా కించపరచడానికి రాస్తున్నది కాదని, వారి భావాలకు నా ప్రతిస్పందన అని గమనించ ప్రార్థన.) ఆయన ఎన్నిక చారిత్రాత్మకం కాదన్నారు, సరే. సమానత్వమా...హ!హ!హ! అని నవ్వారు, సోషలిస్టు అని నిందించారు(ఏం చేస్తాం ఈ కాలంలో కమ్యూనిస్టు, సోషలిస్టు పచ్చి బూతు పదాలైపోయాయి, ఇక్కడ కాపిటలిస్టుల కోటలు కూలుతున్నా!) , తొక్క,తోలు అని...ములట్టో అని ఎగతాళి చేసారు. హి ఈజ్ హాఫ్ బ్లాక్ అంటూ రుసరులాడారు. బరాకేశ్వరుడంటూ 'పన్ను' పొడిచారు.

ఇన్ని చేసినా మరీ నోర్మూసుకొని కూర్చొంటే బరాకాకింతుణ్ని(నేను వ్యక్తిగత పూజకు 'సిద్ధయ్య'ను అని ఇప్పటికే మీకు తెలుసును కాన!) ఎలా అవుతానని, ఈ టపా:-) కేవలం తన 'తోలు' గురించి అవమానపరిచారనే ఓ సగటు మనిషి, రవి అస్తమించని సామ్రాజ్యాన్ని గడగడలాడించిన మహాత్ముడైయ్యాడు. "All men are created equal" అని రాసుకొన్న రాజ్యాంగం కింద ఓ నల్లవాడు, ఆఫ్కోర్స్ హాఫ్ నల్లవాడు, అధ్యక్షుడైన క్రమాన్ని భరించలేని వారు కోకొల్లలు (మా లూసియానా రండి, చూద్దురు గానీ). సో సమానత్వమా...వంకాయా! అన్నా 'వాకే'. ములట్టో, హాఫ్ బ్లాక్`ల గురించి కొంత- లించింగ్ అంటే తెలుసుగా, ఊరంతా పండుగలా చూస్తోంటే, ఊరి నడిబొడ్డున- చెట్టుకు ఉరి తీయడం, చచ్చేదాక! కారణాలు ఎన్నో ఉండొచ్చు- తెల్ల పిల్లను, నల్లవాడు కన్నెత్తి చూడడం దగ్గర నుంచీ- అలాంటి స్థితి నుంచీ ఒక తెల్లపిల్లకు-నికార్సైన ఆఫ్రికా నల్లనయ్యకు పుట్టినోడు అదే అమెరికా అధ్యక్షుడైయ్యాడు చూడండి, అది ఫుల్ బ్లాక్ అధ్యక్షుడైన దానికన్నా వెయ్యిరెట్లు చెంపపెట్టు! ఇది చారిత్రాత్మకం కాదనే వాళ్లుంటే, వారికి చరిత్ర తెలియదని మనం సరిపెట్టుకోవాలి.

మైనారిటీ ఓట్లతో అధ్యక్షపీఠం అలకరిస్తున్నాడు, అనేవారికి ఓ సూచన- అందరికన్నా అమెరికా ననవయువతలో బరాక్̍కు ఎక్కువ ఓట్లు పడ్డాయి, అమెరికా భవిష్యత్తు వీరిదే, వారి స్వరాన్ని తమ ఓటు ద్వారా ప్రపంచానికి ఎలుగెత్తి చాటారు. ఈ రొడ్డకొట్టుడు రాజకీయాలు, మతం పేరిట ఓట్లు దండుకోవడాలు, ప్రజలను భయవిహల్వులను చేయడం ద్వారా అధికారాన్ని చేజిక్కించుకోవడాలు మొదలైన 'రోవియన్' పాలిట్రిక్సు చూసి, చూసి విసుగెత్తి పోయి, చేవ చచ్చిన 'పెద్ద ముదుసలి' పార్టీని పాడెక్కించారు. కొత్త ఆలోచనలతో ముందుకు రావడం మాని, పాచిపోయిన భావాలకు అందమైన మేలిముసుగు వేసి ప్రజలను నమ్మించాలని చూశారు. అది ప్రజలు తిప్పికొట్టారు. ఇకనైనా మేలిముసుగుల్ని, అందమైన మైనపుబొమ్మల్ని, ముద్దుగుమ్మల్ని కాదని, కాస్త సత్తా ఉన్న యువరక్తంతో పార్టీని నింపితే తప్ప, భవిష్యత్తు లేదు. రాబోయే కొద్ది రోజుల్లో ఈ దేశంలో 100% ప్యూర్ వైట్- సంప్రదాయక- మతాభిమాన- జాత్యాహంకార-శతాధిక వృద్ధులు మైనారిటీ కాబోతున్నారని గుర్తెఱిగితే వారికే మంచిది.

నా బుర్ర వేడెక్కిపోయింది ఈ టపాతో, చదవిన మీ బుర్ర వేడెక్కితే కాస్త ఈ 'కాఫీ'పాఖ్యానం చూసి, చదివి, తాగి రిలాక్స్ కండి. తోటరాముడు గారు మీకు డిజైనింగు పాఠాలు, అవిడియాలు ఇందులో ఎన్నో ఉన్నాయి:-) ఇక Thanksgiving కు మా థాయ్`లాండ్ నర్స్ మిస్టర్ వచారా కచాట్రాన్ తన adopted అమ్మా, నాన్న ఇంటిలో జరుపుకొంటూ మమ్మల్ని ఆ విందుకు ఆహ్వానించి మాంఛి టర్కీ వంటకాన్ని, బీన్స్ విత్ మాష్డ్ పొటాటో, స్వీట్ పొటాటో (అదే మన గెనసు గడ్డ) pie ను కడుపు నిండా పెట్టి, మా మనస్సంతోషపరచినారని ఇందుమూలంగా యావన్మందికీ తెలియజేయుటకు సంతసిస్తున్నాను. తాంబూలమొక్కటీ తక్కువైంది:-)

దేశరక్షణ కోసం ప్రాణత్యాగం చేసిన వీరులకు నా నివాళి.

2008-11-29T00:03:00.008-06:00

(హంపి యాత్రలో కీ.శే.సందీప్ ఉన్నికృష్ణన్, ఎన్.ఎస్.జి. కమాండో)

ముంబయిలో జరుగుతున్న మారణహోమానికి అసలు కారణం ఈర్ష్య, అసూయ, ద్వేషం, పగ, ప్రతీకారం లాంటి మానసిక వికారాలు కానీ ఇది మతానికి సంబంధించిన అంశం కాదు. నా ఉద్దేశంలో ప్రపంచ రాజకీయ యవనిక మీద సరికొత్త ధృవతారలా దూసుకువస్తున్న భారతావనిని అడ్డుకోవాలని కొన్ని శక్తులు పన్నిన కుట్ర ఇది. అమెరికాకు దగ్గరవుతున్న నేపథ్యంలో పశ్చిమ దేశాల పౌరులను కేంద్రంగా చేసుకొని సాగించిన మారణహోమం ఇది. అమెరికాలో మారిన రాజకీయ చిత్రంతో పాకిస్తాను, ఇండియాతో సాన్నిహిత్యం పెంచుకోవలసిన అగత్యం ఏర్పడింది. అందుకు తగ్గ సూచనలు ఈ మధ్య కనిపించాయి. పాకిస్తాన్ పశ్చిమ సరిహద్దుల్లో పెరిగిన ఒత్తిడిని తగ్గించుకొనే భాగంలో, కాశ్మీర్ అంశం మరుగున పడిపోతుందనే భయంతో, మళ్లీ ఈ రెండు దేశాల మధ్య నిప్పు రాజేసే ప్రక్రియలో భాగమే ఈ తీవ్రవాద దాడి.

ఇదంతా తెలిసీ దీన్నో మతవిద్వేషంలా తీర్చిదిద్దే పని నిర్విఘ్నంగా చేస్తున్నారు మన రాజకీయ(వి)నాయకులు. అన్నదమ్ముల్లా కలసిమెలసి ఉన్న వారిని విడదీసి, మత విద్వేషాలు రాజేసి, కొన్ని వేల మంది శవాల పునాదులపై తమ రాజకీయ కోటలు నిర్మించుకొని, అధికారానికి వచ్చాక నిర్లజ్జగా చేసిన బాసలు మరచి, మళ్లీ ఇప్పుడు మతవిద్వేషాన్ని రగిలించి ఆ సందడిలో ఇంకో సారి అధికారాన్ని అందుకోవాలనే కుత్సిత నాయకులు ఉన్నంత కాలం దేశం ఇలా రావణకాష్ఠంలా రాజుకుంటూనే ఉంటుంది.

ఇది అంతర్జాతీయ తీవ్రవాదం. దీన్ని అంతమొందించాలంటే అన్ని దేశాల మధ్య నిఘా వ్యవస్థలు ఇచ్చిపుచ్చుకొనే ధోరణి అవలంబించాలి. ఏ ఒక్క దేశానికో ఇది పరిమితం కాదు. కమ్యూనిస్టు బూచిని చూపెట్టి ఓ భయంకర ఫ్రాంకైన్స్టిన్̍కు జన్మనిచ్చింది కోల్డ్̍వార్. తీవ్రవాదం లేని చోట్ల అనవసర యుద్ధాలకు దిగి అంతకంతా అభివృద్ధి చేసారు 'ఏలినవారు'. ఇప్పుడు చైనాకు వ్యతిరేకంగా అమెరికా మన దేశానికి మిత్రరాజ్యంగా మారడం ఈ అరాచక శక్తులకు మింగుడు పడడం లేదు.

సందీప్ ఉన్నికృష్ణన్, హేమంత్ కర్కారె, అశోక్ కామ్టె, విజయ్ సలాస్కర్, గజేంద్ర సింగ్, సదానంద్ దాటె, అరుణ్ చిటాలె, ప్రకాష్ మోరె, ఇలా ఎందరో తమ ప్రాణాలు ఎదురొడ్డి కిరాతక మూకల నుంచి ప్రజలను రక్షించారు. వీరందరికీ నా శ్రద్ధాంజలి, భాష్పాంజలి. 31 ఏళ్ల యువ ప్రాయంలో వీరోచితంగా పోరాడి, తన మితృలను రక్షించే క్రమంలో ప్రాణాలు కోల్పోయిన సందీప్ ఫోటోలు చూస్తూంటే మనసంతా ఏదో వేదన - 'జననీ జన్మభూమిశ్చ, స్వర్గాదపీ గరీయసి!' అన్న రాముడి మాటలు నిజం చేసిన ఈ వీరుడు, స్వర్గమంటూ ఉంటే అక్కడ కూడా తన జన్మభూమిని తలచుకొంటాడేమో?

ఇక ఈ నరమేధంలో ప్రాణాలు కోల్పోయిన వారు...అమీనా హమీద్ షేక్, అశోక్ శివరామ్ ఫూల్కె, అజీజ్ నబిలాత్ రామఖూరె, భాగాన్ షిండె, బ్రెడ్ గిల్బర్ట్ టేలర్, ఫకీర్ మొహమ్మద్, గౌతమ్, హాజీ ఇజాజ్ భాయ్, జాస్మిన్, జుర్గెమ్ హెర్తాజ్ రుఢాల్ఫ్, మస్తాన్ ఖురేషి, మీరా ఛటర్జీ, మైఖేల్ స్టెర్ట్, మిశ్రాలాల్ మోర్యా, ముఖేడ్ భిఖాజీ, గోపాలకృష్ణ, ప్రభుకుమార్ లాల్, రీమా షేక్, సంజయ్ సుర్వె, శంకర్ గుప్తా, శశాంక్ షిండె, శిరీష్ చావ్లా, సీతారామ్ మల్లప్ప, సొహేల్, అహ్మద్ షేక్, స్టడ్డార్ ఢాఫ్నె, సుశాంత్ పాటిల్, ఠాకూర్ బుధా వాఘేలా, అలాన్ షెర్, నయోమి షెర్, గావ్రియెల్ హోల్జ్బర్గ్, రివ్కా - హిందూ, ముస్లిం, క్రిస్టియన్, యూదు - ఇలా ఎందరో అమాయకులు. వీరందరికి నా ఘన నివాళి.

(చిత్రం: సందీప్ ఆర్కుట్ ప్రొఫైల్ నుంచి)

శివశంకరుడికి రాయల రాజనీతి బోధ.

2008-11-23T08:40:00.005-06:00

రాయలసీమ యాత్రను దిగ్విజయంగా పూర్తి చేసిన చిరంజీవికి, ఆ రాయలు తన ఆముక్తమాల్యదలో 'యామునాచార్యుడి వృత్తాంతం'లో ఆ యామునుడు తన కుమారునికి ఉపదేశించిన రాజనీతిని, గుర్తు చేయాలనే తలంపుతోనే ఈ నా ప్రయాస. ఆ రాయలు తన ప్రజలను ఎలా పాలించాడో ఈ పద్యాల వల్ల కాస్త అంచనా వేయొచ్చు. 1509 లో విజయనగర సింహాసనాన్ని అధిష్టించిన ఆ రాయలు 2009లో ప్రభవిస్తున్న ఈ అధినాయకుడికి చేస్తున్న రాజనీతి బోధ ఇది. (అందులోని కొన్ని ఆణిముత్యాలు...)

క. ఏపట్టున విసువక ర
క్షాపరుఁడవు గమ్ము ప్రజల, చక్కి విపన్ను
ల్గూపెట్టిన విని తీర్పుము
కా పురుషులమీద నిడకు, కార్యభరంబుల్.

తే. రాష్ట్రవర్ధన మెదఁగోరు, రాజు మేలు
రాష్ట్రమును గోరుదాఁనగా, ర్యమొ యనంగ
రాదు బ్రహ్మోత్తరములైన, ప్రజలయేక
ముఖపుఁగోర్కిఁ దదంతరా, త్ముం డొసఁగఁడె.

తే. కార్య మొక్కఁడు కనిన మా, త్సర్యమున నొ
కండు గా దని ఖండించుఁ, గ న్నెఱింగి
ఇరువురును గా దనక కొల్వు, విరిసి మీఁద
నల్ల వాఁడెన్నినది సేయ, నగు శుభంబు.

తే. కన్నొక్కటి నిద్రవోఁబెఱ కంట జాగ
రంబు గావించు భూరుహాగ్రంబు మీఁది
యచ్ఛభల్లంబుగతి భోగ మనుభవించు
నెడను బహిరంతరరులపై దృష్టివలయు.

క. శూరాలాపములకు నతి
శూరుఁడు దానయ్యు నృపతి సోఁకోర్వఁదగు
న్వా రుబ్బుదు రందున నిజ
శూరుత దొరలందుఁ గనుట సూ కార్యమిలన్.

ఆ. హదను వచ్చుదాఁక నపరాధిపై రోష
మాఁగి చెఱుపవలయు హదను వేచి
లక్ష్యసిద్ధిదఅఁక లావున శర మాఁగి
కాఁడ విడుచు వింటి వాఁడువోలె.

తే. దేశవైశాల్య మర్థసిద్ధికిని మూల
మిల యొకింతైన గుంట కాల్వలు రచించి
నయము పేదకు నఁరి గోరునను నొసంగి
ప్రబలఁ జేసిన నర్థ ధర్మములు పెరుఁగు.

క. హితులు హితాహితులు సదా
హితులును నై రాజు నెడల నిటు త్రివిధమునన్
క్షితి ననుచరు లుందురు సం
తతమున్ మఱి వారిఁ దెల్పె దన్ విను మనఘా.

క. చేయునది రాజ్య మఁట యఘ
మే యవధిగ నీఁగువారమే మనఁ జన దా
మ్నాయంబు నశక్యాను
ష్ఠేయముఁ జెప్పదు స్వశక్తిఁ జేయఁగఁ జెప్పున్.
------------------------------------------

*విసుక్కోకుండా ప్రజల్ని రక్షించాలి రాజు. రాజు ప్రజల మేలు కోరితేనే ప్రజలు రాజు మేలు కోరుతారు. ప్రజలంతా కోరిన కోర్కెని పరమేశ్వరుడు తీరుస్తాడు.

*ఎవడినైనా ముందు పెద్దవాణ్ణి చేసి ఆ తర్వాత తగ్గిస్తే వాడు మొదల్లో ఉన్న తన తక్కువ స్థితిని తల్చుకోడు ఉన్నతస్థితి నుంచి కింద పడ్డాననే బాధపడతాడు. కాబట్టి శీలవంతులైన వాళ్ళని గుర్తించి వాళ్ళని క్రమక్రమంగా వృద్ధిలోకి తీసుకురావాలి.

*రైతు ముందుగా పొలాన్ని స్వాధీనం చేసుకుని, తర్వాత దాని చుట్టూ ముళ్ళకంచె నాటి, దుక్కి దున్నే ముందు గడ్డల్ని వేర్లను ఏరేస్తాడు. రాజు తన రాజ్యాన్ని కూడ అలాగే చూసుకోవాలి.

*గట్టివాడొకడు ఒక పని సాధించటానికి మార్గం కనుక్కుని చెప్తే, వాడంటే ఈర్య్ష ఉన్న మరొకడు దానికి వ్యతిరేకంగా చెప్తాడు. అక్కడ ఎవరి వైపూ వెళ్లకుండా, ఆ తర్వాత మాత్రం మొదటివాడు చెప్పినట్టు చెయ్యి.

*అధికారులు ఎప్పుడూ రాజుకు మిత్రులు కారు; వాళ్ళ రాబడి వాళ్ళు చూసుకునే వాళ్ళే. చెడ్డపనులు చేసే అధికారుల్ని పూర్తిగా వదిలెయ్యకుండా అతిజాగ్రత్తగా నడిపిస్తుండాలి.

*ఎంత చిన్న చోటులోనైనా వ్యవసాయానికి నీళ్ళ వసతులు కలిగించాలి రాజు. దానివల్ల పంటలు పెరిగి పన్ను వసూళ్ళూ ఎక్కువౌతయ్‌. అలాగే పేదల దగ్గర పన్నులు తక్కువ తీసుకుని, వాళ్ళు వృద్ధిలోకి వచ్చేట్టు చూస్తే తర్వాత వాళ్ళ నుంచి కూడా మంచి ఆదాయమే వస్తుంది. అందుకని ఇళ్ళు, భూములు, పశువులు వదిలేసి వెళ్ళబోయే వాళ్ళని ఆదుకుని వాళ్ళు నిలదొక్కుకునేట్టు చెయ్యాలి.

*ఎప్పుడూ నీతిమార్గంలో నడవాలి రాజు. తను తెలుసుకోవలసిన విషయాలు వీలైనంతగా స్వయంగా తెలుసుకుని ఉండాలి. తెలియని కొద్ది వాటికి ఆప్తుల్ని, మిత్రుల్ని అడగాలి. తెలియని విషయాల్లో తన అభిప్రాయమే ఒప్పనుకోకూడదు.

*రాజు శూరుడైనా తన కొలువులో దొరలు తమని తాము పొగుడుకుంటే విసుగు చూపించకుండా వినాలి. దానివల్ల వాళ్ళకి తృప్తీ కలుగుతుంది, అవసరాల్లో ఇంకా ఉత్సాహంగా కష్టపడతారు.

*వాణిజ్యం పెంచటానికి రేవుల్ని వృద్ధి చెయ్యాలి. ఈతి బాధల వల్ల ఇతర దేశాల జనం వలస వస్తే వాళ్ళని తన శక్తి కొద్ది ఆదుకోవాలి. తోటలు, దొడ్లు, గనులు చూడటానికి ఆప్తులైన వాళ్ళని నియమించాలి.

*రాజుకి ముఖ్యమైన ప్రమాదం లోపలిశత్రువుల నుంచి. అందువల్ల లోపల శత్రువులున్నప్పుడు శత్రురాజు యుద్ధానికొస్తే వాడికి సగం రాజ్యం ఇచ్చైనా సంధి చేసుకుని ముందు లోపలి శత్రువుల్ని అణచాలి.

*ఎవడన్నా మనసుకి నచ్చిన ఆలోచనలు చెప్తే అక్కణ్ణుంచి రాజులు వాణ్ణే మాటిమాటికి సలహా అడుగుతారు. దాంతో వాడికి గర్వం వచ్చి పనులు కావలసిన వాళ్ళ దగ్గర లంచాలు తీసుకుని రాజుకి చెడ్డ ఆలోచనలు చెప్తాడు. అలాటి వాళ్ళని చారుల ద్వారా గమనిస్తూ వుండాలి ఎప్పుడూ.

*కపటం వున్న మనుషులు నువ్వు బాగున్నప్పుడు పొగుడుతారు, కష్టాల్లో ఉన్నప్పుడు పారిపోతారు. జాగ్రత్తగా గమనించు.

*రాజు తన రాజ్యాన్ని ఎలా కాపాడుకుంటాడో అలాగే తన శరీరాన్ని, ఆరోగ్యాన్ని కాపాడుకోవాలి.

*నీ సేవకుల్లో మూడు రకాల వాళ్ళుంటారు ఎప్పుడూ నీ మంచి కోరేవాళ్ళు, మంచిచెడ్డలు రెండూ కోరేవాళ్ళు, చెడే కోరేవాళ్ళు. ఎవరు ఎవరో గ్రహించాలి నువ్వు.

*రాజ్యం చేసేప్పుడు ఎన్నో పాపాలు కట్టుకోకతప్పదు. వీలైనంత అధర్మం జరక్కుండా చూసుకోవటం అవసరం. నీ ధర్మం నువ్వు నిర్వర్తించు.

ఇందులోని పద్యాలు నేనే 'టైపించినా' పద్యార్థాన్ని మాత్రం కె.వి.ఎస్. రామారావు గారి 'ఈ మాట' వ్యాసం నుంచి ఉదహరించడం జరిగింది. ఇందులో నా మరో ఉద్దేశం అలతి అలతి పదాలతో, 'ఆముక్తమాల్యద' అనే నారికేళపాకాన్ని మెత్తటి లేత కొబ్బరిలా తేటతెలుగులో తెలియజెప్పిన ఈ వ్యాసాన్ని అందరికీ పరిచయం చేయాలని, ఆ అమృతాన్ని ఇక్కడ సేవించండి. (ముఖ చిత్రం ఈనాడు సౌజన్యం)

(మొన్న ఊరికెళ్లినప్పుడు 'ఇంద్ర' సమయంలో మా శిష్యుడు చేయించిన ఇచ్చిన ఈ చిత్రం కనపడింది. మీతో పంచుకొందామని ఇలా...)

దేశాటన!

2008-11-16T11:42:00.012-06:00

{ప్రియమిత్రుడు సోమశేఖరరెడ్డితో...}

మూడేళ్ల తరువాత మళ్లీ స్వదేశమెళ్లే భాగ్యం కలిగింది. కానీ అదీ ఓ పదిహేను రోజులు మాత్రమే! అందులో సింహభాగం ప్రయాణానికే సరిపోయింది. ఇక మిగిలింది పది రోజులు. అనుకొన్నవన్నీ చూడకపోయినా అందర్నీ చూసాననే తృప్తి మాత్రం మిగిలింది. దేవనహళ్లిలో దిగి హిందూపురంలో మా మేనమామ కూతురి పెళ్లికి సమయానికే చేరుకొన్నాను. బంధుమిత్రులందరినీ పేరుపేరున పలకరించి వారి కుశలప్రశ్నల జల్లుల్లో తడిసి ముద్దయ్యాను. మా ఊరి వీధి-వీధి తిరిగి చిన్ననాటి జ్ఞాపకాలన్నీ ఓసారి తడిమి చూసుకొన్నాను.

{నేను చదివిన - మహాత్మాగాంధీ ఉన్నత పాఠశాల}

రాగానే మా గురువు శ్రీయుతులు హెచ్.సుబ్బారావు గారిని పలుకరించాలని వారి ఫోన్ నెం. కోసం ఆరా తీసాను. మరుసటి రోజే వారు పరమపదించారన్న వార్త నాకు ఆశనిపాతంలా తగిలింది. ఎందరో విద్యార్థులకు దారి చూపించిన మహనీయుడాయన. వందేళ్ల మహాత్మాగాంధీ హైస్కూలు చరిత్రలో అటువంటి ఉపాధ్యాయుడు "నభూతో: నభవిష్యతి". ఆయన పేరు మీద, మా మరో సైన్సు మాస్టారు శ్రీ తిప్పన్న గారి పేరు మీద "సుబ్బారావు-తిప్పన్న" పతకం ఏర్పాటు చేయాలని నా ఆశయం. అలాగే మరో మిత్రుడు, ఇప్పటి లెక్కల మాస్టారు అయిన సుదర్శన్ బలవంతం మీద నేతాజీ పాఠశాలలో ఓ ప్రార్థనా సమయంలో రెండు మంచి మాటలు చెప్పే అదృష్టం కలిగింది, ఆ రెండు మాటలు "బాగా చదవండి". అంబేద్కర్ అయినా, ఎల్లాప్రగడ సుబ్బారావయినా, అబ్దుల్ కలాం అయినా, ఇప్పటి ఒబామా అయినా వారి విజయాలకు చదువే పునాది అని ఉదాహరణాలతో సహా వారిలో కొంత స్ఫూర్తిని రగిలింపజేసే ప్రయత్నం చేశాను.

{నేతాజీ పాఠశాలలో ఓ ఉదయం}

ఇక హిందూపురం నుంచి అనంతపురంలో ఓ రోజు గడిపి మిత్రులు - శరత్, సోము, శిష్యులు - రవి, చంద్ర, ఆనంద్̍లతో నగర విహారం చేసి వేడి వేడి రాజకీయ కబుర్లతో కాలక్షేపం చేసి రాజధానికి బయలుదేరాను. అదేంటో హైదరాబాదుతో అంత అనుబంధం లేకపోయినా అక్కడికి రాగానే ఓ ఆహ్లాదకరమైన భావన. మా చెల్లి కుటుంబాన్ని పరామర్శించి, అటు నుంచి కాకతీయ రాజధాని ఓరుగల్లుకేగి మా బావ (శ్రీమతి సోదరుడు)తో మాట్లాడి, పనిలో పనిగా వేయిస్తంభాల గుడిని దర్శించి వచ్చాను. నా యాత్రలో "హంపి" వెళ్లడానికి కుదరలేదు, అదొక్కటే పెద్ద బాధ ఇది చూశాక ఆ బాధ వేయింతలైంది. అలాగే ప్రజారాజ్యం అధినేత మా మెగాస్టార్̍ను కలవకపోవడం, ఏం చేస్తాం సమయం లేకపోయింది. మన e-తెలుగు సమావేశంలో బ్లాగు పెద్దలందరినీ కలుద్దామని అనుకొన్నా నేను ఉన్న రోజుల్లో సమావేశం లేకపోయింది.

{చిన్నారి అన్నా-చెల్లెళ్లు}

వస్తూ వస్తూ పెనుకొండలో దిగి బాబయ్య దర్గాను దర్శనం చేసుకొని, మళ్లీ మా హిందూపురం వచ్చి చిన్ననాటి చర్చిలో ప్రార్థన చేసి, తిరుపతి వెంకన్నను, ఆ షిర్డీసాయిని అనంతపురంలోనే మొక్కేసి మొత్తానికి అన్ని దేవుళ్ల దర్శనం అయిపోయిందనిపించాను. అయినా చిత్తశుద్ధి ఉంటే చాలు ఎన్ని పూజలు చేసినా ఫలమేమిటి అని మా వేమన్న ఎప్పుడో చెప్పాడు కదా:-) తిరుగు ప్రయాణంలో లండన్లో ఓ రోజు ఉండే అవకాశం దొరికింది. చాన్నాళ్ల తరువాత ఆప్తమిత్రుడు 'శివ'తో ఓ రోజంతా గడిపే అదృష్టం లభించింది. ఇంటికి వచ్చాక "హోమ్ సిక్" లక్షణాలు కనపడ్డా మా అమ్మా-నాన్న మళ్లీ ఇక్కడికి రాబట్టి కొంతలో కొంత నయం. మళ్లీ ఉరుకుల పరుగుల జీవితంలోకి...ప్చ్!

{ఆప్తమిత్రుడు శివలాలిరెడ్డితో}

అమెరికా కొత్త అధ్యక్షుడు "బరాక్ హుస్సేన్ ఒబామా"!

2008-11-04T22:06:00.002-06:00

నా జోస్యం నిజమైంది. 2007 జనవరిలో రాసిన ఈ టపా చదవండి. అమెరికాలోనే కాక ప్రపంచంలోనే సరికొత్త చరిత్రకు నాంది పలికాడు. "మార్పు" అన్న పదాన్ని తారక మంత్రంగా తీసుకొని సంచలనాత్మక విజయాన్ని సాధించాడు. నల్లజాతి తొలి అధ్యక్షుడిగానే కాక అమెరికాను, తద్వారా ప్రపంచాన్ని కొత్త దిశలో తీసుకెళ్లే బృహత్తర బాధ్యత ఇప్పుడు ఒబామా పైనుంది. "విశ్వమానవుడు" అన్న పదానికి పరిపూర్ణ ఉదాహరణ ఈ కెన్యా-కాన్సాస్ కుమారుడే! ఇదే "మార్పు" ఆంధ్రప్రదేశ్ రాజకీయాల్లో సమూల మార్పులను తీసుకురానుంది. అందరికన్నా ఈ విప్లవాత్మక విజయాన్ని అందించిన అమెరికా ప్రజానీకానికి నా మన:పూర్వక కృతజ్ఞతలు.

"ఎముకలు కుళ్లిన,వయస్సు మళ్లిన,సోమరులారా! చావండి!నెత్తురు మండే,శక్తులు నిండే,సైనికులారా! రారండి!"